bLOSSom

GRADIANT lidera o primeiro e único proxecto EIC Pathfinder Open coordinado por un centro tecnolóxico galego, deseñando sistemas fotónicos capaces de alimentarse coas súas propias perdas de luz e reducir o consumo enerxético entre 100 e 1.000 veces respecto ás solucións actuais.

O proxecto bLOSSom —Sustainable Photonic Systems through Autonomous Loss Harvesting— está enmarcado no programa EIC Pathfinder Open de Horizonte Europa, cun orzamento de 2,99 M€ financiados ao 100 % pola Comisión Europea. O consorcio, liderado cientificamente por Gradiant, reúne a 25 investigadores de alto nivel de catro países: o Łukasiewicz Research Network-Instituto de Microelectrónica e Fotónica (Polonia), Energius e CiTIUS-USC (España), o International Iberian Nanotechnology Laboratory (Portugal) e F6S Innovation (Irlanda).

A proposta central de bLOSSom é aproveitar a enerxía parasita —as perdas de luz inherentes aos compoñentes fotónicos integrados— para realimentar eses mesmos compoñentes, reducindo drasticamente a súa dependencia de fontes externas de enerxía. Para iso explóranse tecnoloxías como unións polímero-plasmónicas electro-ópticas, unións PN tradicionais, materiais 2D como o grafeno e complexos fotosintéticos sintéticos, integrados con unidades de xestión de potencia (PMU).

Como primeiro resultado destacado do proxecto, Gradiant desenvolveu unha neurona fotónica autosostible —actualmente en proceso de patente— capaz de operar sen enerxía externa, recollendo e convertendo as súas propias perdas de luz en enerxía funcional, e decidindo de forma autónoma como distribuíla para activar os seus procesos. Esta innovación abre aplicacións directas na intelixencia artificial —reducindo o elevado consumo enerxético do adestramento e operación de modelos—, telecomunicacións, sector aeroespacial e contornos remotos ou extremos onde o subministro enerxético externo non é viable.

O liderado de bLOSSom reforza a capacidade de Gradiant para coordinar proxectos de alta complexidade a escala europea e contribúe de forma decisiva ao posicionamento de Galicia como polo de innovación en tecnoloxías fotónicas disruptivas, impulsando novas liñas de investigación, atraendo talento cualificado e xerando oportunidades de transferencia tecnolóxica.