H2020 NICE
Solucións Baseadas na Natureza para a xestión sostible do ciclo da auga urbana fronte ao cambio climático
CETIM validou en distintas zonas climáticas de Europa tecnoloxía propia para mellorar a calidade da auga e mitigar os efectos adversos do cambio climático, logrando eliminar máis do 95 % de contaminantes emerxentes e recuperar nutrientes para a súa reutilización.
O proxecto europeo H2020 NICE tivo como obxectivo mellorar as Solucións Baseadas na Natureza (SbN) mediante o desenvolvemento de enfoques innovadores e eficientes para a súa aplicación na mellora da calidade da auga e a mitigación do cambio climático —inundacións e secas—, contribuíndo a unha xestión da auga urbana máis sostible. CETIM participou no proxecto liderando e guiando o desenvolvemento científico-técnico de distintas solucións, que foron testadas en 15 proxectos piloto distribuídos en 10 localidades de Europa e outras rexións do mundo.
Durante o proxecto investigáronse distintas técnicas de mellora e novas aplicacións: o uso de substratos adsorbentes e microorganismos para a eliminación de contaminantes emerxentes, plantas para a eliminación de patóxenos, materiais para a recuperación de nutrientes, optimización da aireación para contaminantes convencionais e xardíns verticais para a depuración e reutilización de augas grises.
Xestión da auga
Cambio climático
Solucións Baseadas na Natureza
Centro Tecnolóxico
Data
En concreto, investigouse o uso de substratos adsorbentes innovadores e sostibles —biochar, fibra de coco e zeolitas— para a eliminación de contaminantes emerxentes como antibióticos, hormonas e herbicidas. Así mesmo, identificáronse microorganismos capaces de reducir ata un 80 % de ditos contaminantes, e desenvolveronse materiais para a recuperación de fósforo con potencial de reutilización como recurso.
A sostibilidade das solucións foi respaldada mediante análises de custo do ciclo de vida, que confirmaron a vantaxe das SbN fronte ás alternativas convencionais de infraestrutura gris. Así, o proxecto H2020 NICE rematou con resultados moi prometedores, validando tecnoloxías de xestión circular da auga en diferentes zonas climáticas europeas e contribuíndo a un modelo urbano máis resiliente e sostible fronte aos retos do cambio climático.